خارج نطاق الفيض
كلب..كلب...تشترى كلللللللب!!!!!
تذكرت هذه الجملة الشهيرة بعد ان وضعت سماعة الهاتف وذلك بعد إتخاذى قرارا بأن اعرف هو الموضوع ماشى إزاى؟؟؟!!!...فمنذ شهرين وانا يراودنى فكرة شراء سيارة صغيرة بالتقسيط على ان تكون من النوع المحترم الذى لا "يبلط فى الخط" على كوبرى أكتوبر فى وفت الذروة اة "تشرق" مع اول ارتفاع لدرجة الحرارة بسبب السحابة السودا والخضرا إياها. وما أكثر الإعلانات التى "كبر الموضوع فى نافوخى" وقلت لابد وحتما من التنفيذ واهو اللى بيلهفه التاكسجية القسط اولى به ويبقى البيت بيت ابونا. وجلسنا نحسبها تبعا لقيمة القسط الشهرة والمقدم فوجدنا ان الشركة ستهدينا السيارة بنصف الثمن؟؟ ولأن زوجى محاسبا من العيار الثقيل ومراجعا أيضا فمن اول وهله ادرك ان هناك فخ ما...طيب نعمل ايه يا عبد الرحيم نتصرف كيف يا عبد الرحيم؟ قررت ان اقطع الشك باليقين واتصل بشركة السيارات الكبرى إياها صاحبة صفحات الإعلانات الخضراء التى تحسسك ان الدنيا وردى والحدوتة كلها كأنك مش بتشترى اوتوموبيل وانما كككككككلب. رد على الموظف ذات الصوت الرقيق وكأنه يرد من تحت اللحاف واللسان المعوج بالإنجليزية اللى تدوخ وقالى حضرتك عاوزة تركبى ايه يا هانم؟؟..تركت السماعة والتفت يمينتا ويسارا فلم اجد غيرى بالمنزل..اذن انا الهانم:)) وأركب ايه؟؟ فقلت له عما فكرت فيه ومن اربع اختيارات استبعد بدوره إثنان وبعد ان كسفنى وسألنى عن مرتبى :منه لله: وطبعا وجد ان مرتبى بالكاد يكفى قيمة القسط!!! يا لهوى..إزاى يا مستر؟ قالى نحسبها..العربية بـ 64000، قلتله لأ 63.5الف..قالى لأ حضرتك غليت!! من امبارح للنهاردة غليت؟؟ اشمعنى؟ ماعلينا هو الكلام بفلوس، كمل يا عم الناعم...قالى اكيد حضرتك حتاخدى على اطول فترة تقسيط ممكنة (يادى الكسفة) ايوة يا بيه...قالى تدفعى المقدم 13000 جنيه والباقى 1350 جنيه كل شهر..يادى الحوسة ليه يا مستر...قالى نحسبها كده تبقى العربية إجمالا مش عارف بكام وتسعين الف جنيه...نهارك أسود..هذا ما نطق به لسان حالى ولم تترجه كلماتى..حاجة بسيطة يا دكتورة يعنى فى السنة خمسة آلاف جنيه..بيسطة صح..قلتله اكيد..وإمعانا فى التلذذ بغيظى قاللى الناعم ولو حضرتك مش عارف عاوزة سنترلوك ومش عارف كام حاجة تانية رطنهم بسرعة كده يزيد السعر 4آلاف جنيه..رددت سريع لألألألألألألألأ انا عاوزاها من غير رفاهية..رد ببراءة يبقى كده الإختيار الرابع كمان مش حيناسب إمكانياتك. مممم حسبتها بسرعة..لازم نخلع بشياكة..طيب اتشرف بيك يا مستر عشان اكلمك انت لما اقرر؟ شرفنى باسمه وكمان ارقام موبايلاته الشخصية (واخدين بالكم) موبايلالالاته مش موبايل واحد وتعمدت ترقيق صوتى وتركيك آخر كلمتين سيسمعهم منى للأبد كتما للغيظ ووصلة الإتهامات بالنصب على عباد الله التى كانت تغلى فى حلقى.
السؤال؟ من الذى يراجع تلك الإعلانات التى تنصب على خلق الله وتمنيهم بسيارة ترحمهم من بهدلة المواصلات حتى لو كانت تاكسيات كما تفعل واحدة مثلى؟ من اين لهم بتلك البجاحة والنصب اللى عينى عينك؟ آه نسيت ان اذكر ان قسط هذه السيارة فى الجريدة 540جنيه..اى والله...تخيلوا؟ هل تلك هى الحرية بان نطلق كلمات النصب وإعلانات الضحك على الدقون ومسابقات الزيرو تسعة وعشرة وواحدة ونص كمان؟؟ الا لعنى الله على تلك حرية.....وأخيرا يا سادة
تشتروااااا ككككككككككككـــــلب
11 comments:
ازيك يا دودو
اعلانات ايه بس اللي بتتراجع
منتظره لفه بالعربيه لما تشتريها او عضة من الكلبة اي حاجة يعني
وصباحك فل
قديما قالوا اللي معهوش ميلزموش
بس للأسف أغلبنا معناش وكلنا يلزمنا
فكرة التقسيط دي فكرة شيطانية بتضمن أننا نلف في ساقية الحياة بلا توقف أو حتي تفكير في التوقف
وكل ما نفكر نوقف نقول مينفعش دأنا عليا أقساط
كل ما أفكر أسيبلهم الشغل مطربأ علي نفوخهم نقول مينفعش دأنا علي أقساط
أشتري حريتك ..فقد ولدتنا أمهاتنا أحرارا ..واللي معهوش ميلزمهوش
صباح الخير يا دكترة
هو حضرتك مش من مصر برضه ولا أيه؟
ههههههههههههه
فكرتيني من كام يوم كده قابلني واحد مصري هنا في دبي سيتي سنتر وقالي بترحاب شديد جدا والابتسامة من الودن للودن الف مبروك يا فندم انت كسبت معانا
رديت عليه بتلقائية شديدة:
وله .. انا سبت مصر كلها بسس الهدايا بتاعتكم دي .. انتو ورايا ورايا
:)
المقالب الدعائية دي موضتها قدمت أوي مش عارفين مصرين عليها ليه؟؟ منتهي الغباوة وبصراحة انتي غلطانة انك مهزأتهوش وفشيتي غلك فيه
عايز ابقي اجي هنا كتير بقي الله يخليكي متبقيش تقفلي الدكانه كده تاني وحمد لله ع السلامة
اهلا اهلا...اولا شكرا للزيارة العزيزة للدكانة على رأى أيمن أفندى...انا والله يا جماعةت من مصر عشان كده حبيت أتعلم نصبة جديدة اصلة من فترة وانا بالعة شوية حاجات من دى كتييييير..انا شخصيا من رافضى ذل الدين..وموضوع معهوش ومايلزموش...فكروا ف موضوع اهم من كده شوية بغض النظر عن مدى أهمية السيارة لى شخصيا، لو واحد غلبان بيتجوز ومحتاج يشترى أجزة بالقسط او اى حاجة من أساسيات عيشته...ندبحه..ننصب عليه..اصل الجواز مثلا ضرورى ولولا القسط كان 50% من شباب مصر ماتجوزوش. الفكرة ان مصر حتفضل هى هى بلد النصب على خلق الله..دا احنا علمنا الصينيين النصب لما شرفونا وعاشرونا فى بلدنا اتعلموا مننا...تجيب الحاجة الصينى دلوقتى شكلها حلو وزى الفل وسعرها مش رخيص بس معقول ولكن..كنا الأول نقول اهى بتعمل بتمنها دلوقتى مش بتشتغل أصلا...وربنا يخلى لنا الكلب:)))
لا غير اللفة
انا عايزة اكل من طبيخيك
يا دكتووووووووووووووووورة
:)
الحكاية يا فندم ممكن تلخيصها في مثل شعبي واحد:
يافرعون ايش فرعنك؟ مالقتش حد يلمني
هي كدة
نصب واعلانات وابتزاز و0900 وضحك ع الغلابة ومفيش حد بيقول لهم اي حاجة
فبتلاقي كل يوم بيزيدوا وبيكتروا
معلش كان نفسي ازور مدونتك لاول مرة في ظروف افضل
تحياتي ليكي
باختصار شديد
على قد لحافك مد رجليك
يا جماااعة انا مش باكتب الكلام عشان تنصحونى بعلى قد لحافك مد رجليك...الموضوع هو نظام بلد..انا باضرب مثل مش اكتر..وحقيقى شكرا لإهتمامكم بالرد والتعليق...اسعد دائما بزياراتكم
في بلدنا الجميل
اتلغت كل علامات التشكيل
إلا الفتحة
كل الأدوات بقت أدوات نصب
والناس إما ناصب - نصاب يعني
أو منصوب عليه
حسبي الله ونعم الوكيل
خلينا نرصد بجد
احنا نشد بعض الحرية ووايضا شوية تقدم علشان كده
ماذا حدث مع شعب 7 الاف سنة نصب وليس حضارة
1- عندنا الان افضل قنوات جنسيه غنائية
2-عندنا اكبر كم من مسابقات التليفونات التى تسنزف الناس
3-عندنا على كل تليفونات الرجال والشباب ملذا وطاب من اشياء نخجل منها
4-عندنا علاقات على النت فقط لممارسة اشياء مخجلة
عموما عمار يامصر
تصدقي و تؤمني بالله قولي لا اله الا الله. أنا أول مرة حالاً أعرف انك اتجوزتي. ألف ألف مبروك و لو اني كنت مستنية دعوة و لا خبر على الطاير و لا أي حاجة.
أكيد أنا متأخرة بس أنا ماعرفش حتى انتي اتجوزتي امتى. عموماً مليون مبروك مرة تانية و عقبال البكاري و اوعي تقولي لي انك جبتي بيبي كمان و الا أروح أولع في نفسي بقى.
و على فكرة أنا كمان كان بيراودني حلم العربية بتاعة الاعلانات دي يا ريت بقى نشير الكلب و نقضيها كدا :)))
Post a Comment